नवी दिल्ली: गुजरातमधील भरूच जिल्ह्यातील औषध कारखान्यात बुधवारी झालेल्या स्फोटात किमान दोन कामगार ठार आणि २० जखमी झाले, असे पीटीआयने अधिकाऱ्यांच्या हवाल्याने सांगितले.पीटीआयने भरुचचे जिल्हाधिकारी गौरांग मकवाना यांच्या हवाल्याने सांगितले की, “फॅक्टरीमध्ये बॉयलरच्या शक्तिशाली स्फोटामुळे मोठी आग लागली.”“स्फोटाची तीव्रता इतकी भीषण होती की कारखान्याची रचना कोलमडली. बहुतांश कामगार बचावण्यात यशस्वी झाले, तर त्यापैकी दोन जण अडकून मरण पावले. आग विझवल्यानंतर त्यांचे मृतदेह ढिगाऱ्यातून बाहेर काढण्यात आले. या घटनेत जवळपास 20 कामगार किरकोळ जखमी होऊन बचावले,” ते पुढे म्हणाले.
अधिकाऱ्याने दिलेल्या माहितीनुसार, सायखा जीआयडीसी परिसरातील एका कारखान्यात पहाटे अडीचच्या सुमारास ही घटना घडली.स्फोटानंतर एक कामगार बेपत्ता असल्याच्या वृत्तानंतर अग्निशमन दल, पोलीस आणि फॉरेन्सिक टीम घटनास्थळाची पाहणी करत आहेत.
