पुणे विमानतळावर वर्षभरात 1 कोटीहून अधिक प्रवासी, 6.1 टक्के वाढ


संपादक – गणेश जाधव, प्रतिनिधी – रोहित माने

पुणे – पुणे आंतरराष्ट्रीय विमानतळ हे देशातील वेगाने वाढणाऱ्या विमानतळांपैकी एक म्हणून समोर आले आहे. गेल्या वर्षात (२०२५) पुणे विमानतळावरून होणारी उड्डाणे आणि प्रवासी संख्या वाढली आहे.

या वर्षात एक कोटी आठ लाख प्रवाशांनी पुणे विमानतळावरून प्रवास केला असून प्रवासी संख्या ६.१ टक्क्यांनी वाढल्याचे दिसून आले आहे.

पुणे विमानतळाचे नवीन टर्मिनल विकसित करून प्रवाशांसाठी सुविधा वाढवण्यात आल्या आहेत. सध्या विमानतळवरून दररोज २०० च्या पुढे विमांनाच्या फेऱ्या होत आहेत. नवीन टर्मिनल सुरू झाल्यानंतर काही नवीन शहरे जोडण्यात आली आहेत. तसेच, यंदा पुणे – दोहा ही नवीन आंतरराष्ट्रीय विमानसेवा सुरू करण्यात आली आहे. प्रवाशांना मिळणाऱ्या सुविधा व शहरांसोबत वाढलेल्या हवाई प्रवासाच्या सुविधेमुळे प्रवासी संख्या वाढत आहे. गेल्या वर्षी पुणे विमानतळावरून एक कोटी दोन लाख प्रवाशांनी प्रवास केला होता. यंदा प्रवासी संख्या सहा लाखांनी वाढल्याचे दिसून आले आहे.

उड्डाणांची संख्या वाढली

विमान वाहतुकीच्या वाढीचा थेट परिणाम विमान हालचालींवरही दिसून आला. २०२४ मध्ये ६७ हजार ४८४ उड्डाणे झाली होती. ती संख्या २०२५ वाढून ७० हजार ९९२ उड्डाणे नोंदली झाली. उड्डाणांच्या संख्येत देखील ५.१ टक्क्यांची वाढ झाल्याचे दिसून आले. उड्डाणे वाढल्यामुळे प्रवासी संख्येत वाढ झाली आहे. या वाढत्या प्रवाशांचे व्यवस्थापन करण्यासाठी विमानतळ प्रशासनाने तांत्रिक आणि डिजिटल सुविधा मोठ्या प्रमाणात वाढवल्या आहेत. डिजी यात्रासह ‘ई-गेट्स’, ‘इनलाइन बॅगेज स्क्रीनिंग सिस्टीम’, प्रवाह व्यवस्थापन प्रणाली आणि १०६ उड्डाण माहिती स्क्रीनमुळे प्रतीक्षा वेळ कमी झाली असून प्रवाशांना वेळेवर माहिती मिळू लागली आहे. यामुळे प्रवाशांच्या समाधानातही वाढ झाल्याचे सर्व्हेमध्ये दिसून आले आहे. सर्व्हेत जागतिक क्रमवारीत सुधारणा झाली, अशी माहिती विमानतळ प्रशासनाकडून देण्यात आली.

2026मध्ये होणार विस्तार

लोहेगाव येथील सध्या कार्यरत असलेल्या पुणे आंतरराष्ट्रीय विमानतळावरील जुन्या टर्मिनल इमारतीचे नूतनीकरण, भूसंपादन झाल्यानंतर दुसऱ्या तिमाहीत पुरंदर येथे नवीन पुणे विमानतळाच्या बांधकामाला सुरुवात, आणि पुणे महानगर परिवहन महामंडळ लिमिटेडच्या (पीएमपीएमएल) ताफ्यात १,५०० बसेसची वाढ, ही २०२६ मध्ये शहराला वाहतूक क्षेत्रात पाहायला मिळणारी काही अपेक्षित घडामोडी आहेत.


22
कृपया वोट करा

जनसामान्यांचा आवाजच्या बातम्याबद्दल मत व्यक्त करा

हे देखील पहा...

error: Content is protected !!