संपादक – गणेश जाधव, प्रतिनिधी – रोहित माने
पुणे आणि पिंपरी-चिंचवड परिसरात गुन्हेगारीच्या घटनांनी पुन्हा एकदा डोकं वर काढलं आहे. एका अत्यंत क्षुल्लक आणि धक्कादायक कारणावरून एका तरुणाची निर्घृण हत्या करण्यात आल्याची घटना तळेगाव दाभाडे परिसरात घडली आहे.
केवळ आईवरून शिवी दिली, या रागाच्या भरात एका तरुणाने दुसऱ्याचा दगडाने ठेचून खून केला. या घटनेमुळे संपूर्ण शहरात खळबळ उडाली असून नागरिकांमध्ये भीतीचे वातावरण पसरले आहे.
मैदानावर क्रिकेट पाहताना सुरू झाला वाद
समोर आलेल्या माहितीनुसार, मयत संतोष पवार आणि आरोपी सनी चव्हाण हे दोघेही सोमाटणे फाटा येथील जुन्या पुणे-मुंबई महामार्गालगत असलेल्या मैदानात क्रिकेटचा सामना पाहत होते. विशेष म्हणजे हे दोघेही एकमेकांसाठी पूर्णपणे अनोळखी होते. एकाच कट्ट्यावर बसून सामना पाहत असताना त्यांच्यात कोणत्यातरी कारणावरून किरकोळ बाचाबाची झाली.
दगडाने डोके ठेचून केली हत्या
या वादादरम्यान मयत संतोष पवार याने आरोपी सनी चव्हाण याला आईवरून शिवीगाळ केली. ही शिवी सनीच्या जिव्हारी लागली आणि त्याचा रागावरील ताबा सुटला. संतापलेल्या सनीने तिथेच पडलेला एक मोठा दगड उचलला आणि संतोषच्या डोक्यावर जोरदार प्रहार केला. हा घाव इतका भीषण होता की संतोषचा जागीच मृत्यू झाला. सायंकाळी साडेपाच ते सहाच्या सुमारास ही घटना घडल्याने मैदानात एकच पळापळ झाली.
पोलिसांनी आरोपीला ठोकल्या बेड्या
घटनेची माहिती मिळताच तळेगाव दाभाडे पोलिसांनी तातडीने घटनास्थळी धाव घेतली. पोलिसांनी पंचनामा करून मृतदेह शवविच्छेदनासाठी शासकीय रुग्णालयात पाठवला आहे. अवघ्या काही वेळातच पोलिसांनी आरोपी सनी चव्हाण याला ताब्यात घेऊन बेड्या ठोकल्या आहेत. “केवळ शिवीगाळ केल्याच्या रागातून ही हत्या झाल्याचे प्राथमिक तपासात दिसत आहे,” अशी माहिती पोलिसांनी दिली.
नागरिकांमध्ये चिंतेचे वातावरण
या घटनेमुळे पिंपरी-चिंचवड पोलीस आयुक्तालयाच्या हद्दीतील सुरक्षेचा प्रश्न पुन्हा एकदा चर्चेत आला आहे. तरुणांमध्ये संयमाचा अभाव आणि वाढत्या रागामुळे अशा छोट्या कारणावरून हत्या होणे, ही गंभीर बाब असल्याची चर्चा स्थानिक नागरिकांमध्ये आहे. सध्या तळेगाव दाभाडे पोलीस या प्रकरणाचा अधिक तपास करत आहेत.
