संपादक – गणेश जाधव, प्रतिनिधी – रोहित माने
बारामती तालुक्यातील सोनगाव येथे सरपंच महिलेच्या पतीचा खून करणाऱ्या कामगाराला बारामती अतिरिक्त सत्र न्यायालयाने जन्मठेप आणि तीन हजार रुपये दंडाची शिक्षा ठोठावली. अतिरिक्त सत्र न्यायाधीश विजय बर्डे यांनी हा निकाल दिला.
पनीश उर्फ पांग्या आनंद्या भोसले असे शिक्षा झालेल्या आरोपीचे नाव आहे. युवराज थोरात (वय 50, दोघे रा. सोनगाव) यांचा खून केल्याप्रकरणी आरोपी भोसलेविरोधात गुन्हा दाखल करण्यात आला होता. थोरात यांच्या मुलाने बारामती तालुका पोलिस ठाण्यात तक्रार दिली होती.
ही घटना 15 जानेवारी 2020 रोजी बारामतीतील नीरा-कऱ्हा नदीच्या संगमावर असलेल्या सोनेश्वर मंदिराच्या पायऱ्यांवर घडली. मकरसंक्रांतीनिमित्त युवराज थोरात सोनेश्वर मंदिरात दर्शनासाठी आले होते. त्या वेळी आरोपीने थोरात यांना शिवीगाळ केली. ‘आता सरपंच झाल्याने खूप माज आला आहे, एकेकाला भोसकून काढतो,’ असं धमकावून आरोपीने युवराज थोरात यांना सुरा भोसकून पळ काढला.
दरम्यान, या खटल्यात अतिरिक्त सरकारी वकील ज्ञानदेव शिंगाडे यांनी बाजू मांडली. त्यांनी सरकार पक्षातर्फे तेरा साक्षीदार तपासले. त्यामध्ये चार प्रत्यक्षदर्शी साक्षीदारांची साक्ष, आरोपीच्या कपड्यावरील रक्ताचे डाग, गुन्ह्यात वापरलेला सुरा हे पुरावे महत्त्वाचे ठरले.
नेमकं काय घडलं होतं?
बारामती तालुक्यातील सोनगाव येथे 2020 साली मकरसंक्रांतीच्या दिवशी एक धक्कादायक घटना घडली होती. सरपंच जयश्री युवराज थोरात यांचे पती युवराज थोरात यांची सोनेश्वर मंदिरजवळ एका तरुणाने धारदार शस्त्राने वार करून हत्या केली. महिलेला त्रास देणाऱ्या तरुणाला हटकल्याने हा राग अनावर होऊन तरुणाने थोरात यांच्यावर हल्ला केला. त्यानंतर संतप्त नागरिकांनी पारधी समाजाची घरे पेटवून दिल्याने परिस्थिती आणखी चिघळली होती.
