संपादक – गणेश जाधव, प्रतिनिधी – रोहित माने
पुणे – सार्वजनिक वाहतुकीच्या नियमांचे उल्लंघन करून सोशल मीडियावर व्हिडिओ अपलोड केल्याबद्दल पुणे महानगर परिवहन महामंडळाने (पीएमपीएमएल) एका रीलस्टारला कडक नोटीस पाठवली आहे. या प्रकरणात अथर्व सुदामेला लक्ष्य करण्यात आले असून, महामंडळाच्या बससेवेचा गैरवापर केल्याचा आरोप आहे.
या घटनेमुळे महिलांच्या सन्मानाला धक्का बसल्याचेही महामंडळाने नमूद केले आहे.
महामंडळाच्या अंतर्गत धोरणांना ठोकर
या प्रकरणाची सुरुवात अशी झाली की, अथर्व सुदामे याने पीएमपीएमएलच्या बसमध्ये पूर्वसंमती न घेता एक रील तयार केली आणि ते इन्स्टाग्रामवर शेअर केले. महामंडळाच्या अधिकाऱ्यांच्या मते, या रीलमध्ये बसच्या मालकीच्या वस्तूंचा अनुचित वापर दिसून येतो. विशेषतः, महामंडळाचा अधिकृत गणवेश, ई-मशीन आणि बॅच बिल्ला यांचा बेकायदेशीरपणे उपयोग करण्यात आला. यामुळे महामंडळाच्या अंतर्गत धोरणांना ठोकर लागली असून, जनमानसातील प्रतिमेला कलंक लागला आहे.
रीलद्वारे महिला प्रवाशांच्या प्रतिष्ठेला हानी
नोटीसमध्ये महामंडळाने स्पष्टपणे सांगितले आहे की, या रीलद्वारे महिला प्रवाशांच्या प्रतिष्ठेला हानी पोहोचली आहे. रीलमध्ये महिलांचे चित्रण अपमानजनक पद्धतीने करण्यात आले, ज्यामुळे त्यांच्या मानसिक सुरक्षिततेला आणि सार्वजनिक ठिकाणी असलेल्या हक्कांना धोका निर्माण झाला. परिणामी, पीएमपीएमएलच्या व्यावसायिक हितांना आणि बससेवेवरील लोकांच्या विश्वासाला तडा गेला. महामंडळाने या कृत्याला त्यांच्या नियमाविरोधी ठरवले असून, याची गांभीर दखल घेतली आहे.
अथर्व सुदामेला कठोर निर्देश
या नोटीसमध्ये अथर्व सुदामेला कठोर निर्देश देण्यात आले आहेत. प्रथम, सदर आक्षेपार्ह रील इन्स्टाग्रामवरून ताबडतोब काढून टाकावा. दुसरे, भविष्यात महामंडळाच्या बससेवेशी संबंधित कोणताही फोटो, व्हिडिओ, रील किंवा मजकूर सोशल मीडियावर अपलोड करण्यापूर्वी सक्षम अधिकाऱ्यांची लेखी परवानगी घेणे अनिवार्य आहे. या नियमांचे पालन न केल्यास कायदेशीर परिणाम भोगावे लागतील, असा इशारा देण्यात आला आहे.
