संपादक – गणेश जाधव, प्रतिनिधी – रोहित माने
बारामती – जिल्ह्यात वाढत चाललेल्या प्रशासकीय कामकाजाच्या पार्श्वभूमीवर राज्य सरकारने बारामती येथे अतिरिक्त जिल्हाधिकारी पद निर्माण करण्यास मंजुरी दिली आहे. या निर्णयामुळे बारामतीसह परिसरातील महसुली आणि इतर प्रशासकीय कामांना गती मिळणार असल्याची अपेक्षा व्यक्त होत आहे.
पुणे जिल्ह्याची वाढती लोकसंख्या, औद्योगिक विस्तार आणि विविध विकास प्रकल्पांमुळे कामाचा व्याप लक्षणीय वाढला आहे. विशेषतः बारामती, इंदापूर आणि दौंड या तालुक्यांमध्ये प्रशासकीय प्रकरणांची संख्या वाढत असल्याने स्थानिक पातळीवर स्वतंत्र अतिरिक्त जिल्हाधिकारी नेमण्याची मागणी सातत्याने केली जात होती. त्यानुसार शासनाकडे प्रस्ताव पाठविण्यात आला होता.
सरकारने अखेर या प्रस्तावाला मंजुरी देत बारामती येथे अतिरिक्त जिल्हाधिकारी पद निर्माण करण्यास हिरवा कंदील दिला आहे. नव्या कार्यालयामुळे महसूल विषयक कामे, अपील प्रकरणे, जमीन अधिग्रहण, निवडणूक प्रक्रिया आणि इतर शासकीय कार्यवाही अधिक वेगाने पार पाडता येणार आहे. तसेच नागरिकांना किरकोळ कामांसाठी पुणे जिल्हाधिकारी कार्यालयात जाण्याची गरज कमी होणार असल्याचे सांगितले जात आहे.
यापूर्वी पुणे जिल्ह्यात दोन ठिकाणी अतिरिक्त जिल्हाधिकारी पदे निर्माण करण्याचा विचार होता. मात्र, सध्या बारामतीसाठीच मंजुरी देण्यात आली आहे. या निर्णयामुळे बारामतीच्या प्रशासकीय महत्त्वात वाढ झाली असून स्थानिक स्तरावर समाधान व्यक्त केले जात आहे.
लवकरच या पदावर अधिकृत नियुक्ती होण्याची शक्यता असून त्यानंतर कार्यालयीन कामकाजाची औपचारिक सुरुवात होणार आहे.
